LEHEN TALDEAK GASTEIZEN EMANGO DIO HASIERA DENBORALDIARI

Larunbat honetan izango da, 16:00etan, Alaves C taldearen aurka

Hastera doa denboraldi berri bat. Ourenseren aurkako kanporaketan izandako porrota fresko dirau gure oroimenean. Jaitsiera izan zen gure lehen taldearentzat baina iritsi da hori atzean utzi eta aurrera begira jartzeko unea denboraldi berri bat hasi baita.

Abuztuaren 1etik taldea gogor aritu da lanean Mikel Arruabarrena entrenatzaile berriaren aginduetara. Entrenamendu-saio asko eta aurre denboraldiko partida zailak, joan den larunbatean jokatutako goiz eta arratsaldeko saioak esaterako.

Bigarren taldeko jokalariez indartuta, goizean Loinatzen 3-0 irabazi zioten Alaves C-ri eta arratsaldean Arrasaten hiruko txapelketan, etxekoen eta Touringen aurka jokatu zuten.

Jokalariek aste hauetan erakutsi dute talde ona osatzen dutela; anitza eta kalitatezkoa, denboraldi honetan gogortasun handiko maila berriari aurre egiteko prestatua. Helburua edo ametsa ahalik eta gorenen egotea da, galdutako kategoriara itzultzeko.

Estreinaldia larunbat honetan izango da, arratsaldeko 4etan, Jose Luis Compañón zelaian (belar artifiziala), Alaves C taldearen aurka.

Denboraldi zoragarria dator, gozatuko dugu.