2.RFEF-ERA ITZULI GARA
3. RFEF IV. multzoa: 2. RFEFera igotzeko finaleko itzuliko partida
Beasain 2-0 Cortes (Pita, Bengo)
Hiru urte geroago, Beasain KE taldearen lehen taldea 2. RFEF mailara itzuli da. Garaipenarekin, bi eta huts, joaneko partidan Cortesen golegile izan ziren jokalari berberekin, Beasainek igoera erdietsi zuen bere publikoaren aurrean.
Gainezka zegoen Loinatz Udal Futbola zelaia, Cortes CDren jarraitzaile asko bertan zirela.
Lehen zatian Beasainek jokoaren kontrola izan zuen, baina arrisku gehiagorekin iristea falta izan zitzaion. Gogor aritu zen aurkaria, indarkeritik gertu, eta epaileak hori ametitu egin zuen lan kaskarra eginez. Horrek zale txuri-urdinak sutu zituen, bereziki bisitarien jokalari baten sarrera beldurgarri baten ondoren, zeinak etxekoen entrenatzailea kanporatu izatea ekarri zuen. Arbitroen burugabekeriak, tarteka, kutsu surrealista hartu zuen. Atsedenaldira huts eta hutsekoarekin iritsi ginen.
Bigarren zatian talde bakarra egon zen zelaian. Bagoilariak jaun eta jabe izan ziren, eta asko lagundu zuen Markel Pitaren golak bosgarren minutuan, Beñaten jokaldi bikainaren ondoren. Beasain oldartuta zegoela, zazpi minutu geroago Eñautek pase bikaina eman zion Bengori behin betiko bi eta hutsekoa jartzeko markagailuan (5 gol playoffetako 6 partidatan eta kanporaketa lau eta bateko orokorrarekin itxiz).
Markagailua handitzeko aukera gehiago izan ziren, baina txuri-urdinen euforiaren erdian partida amaitu zen eta 2. RFEF mailara igotzea lortu zen.
Zaila da arrakasta hau denboraldiko zortzigarren jardunaldian imajinatzea, taldea azken aurreko postuan zegoenean, bost punturekin. Une horretatik aurrera, joko eta emaitza bikaineko bolada zoragarriak playoffera eraman gintuen, hiru kanporaketa, sei partida, bost garaipen eta berdinketa batekin ebatzita. Ez dut uste inork zalantzan jar dezakeenik talde txuri-urdinak merezimenduak soberan egin zituela sari potoloa lortzeko.
Zorionak jokalariei, entrenatzaileei, lehendakari eta zuzendaritza batzordeari, jarraitzaileei eta BEASAIN KEko familia osatzen duten guztiei.
