Turri, jokalari ohi eta laguntzaile nekaezinak utzi gaitu
Bizi dugun momentu zail honek joaten ari zaizkigun familiarteko eta lagunak agurtu ezina ekarri digu. Egoera honetan, aipamen berezi bat egin nahi du Beasain KE-ko zuzendaritza taldeak Roberto Turrientes “Turri”ren heriotzaren aurrean.
Ezeren aurretik, bat egiten dugu “Turri”ren senitarteko eta gertukoekin euren samiñean une latz hauetan. Handienetako bat joan zaigu. Azken joan etorrian agur esan digu baina Beasain kirol Elkartearen familia osatzen dugun beasaindar futbolzaleok betirako gure bihotzean gordeko dugu.
Futbola maitatzen, jokatzen eta batez ere bizitzen eredu izan genuen baita beasaindartasuna hara eta hona fútbol zelaiez zelai harrotasunez eramaten. Joan zara baina gure oroimenean jarraituko duzu Turri.
Eskerrik asko zure bihotzeko Beasain KEri azken ia berrogei urte hauetan emandakoagatik. Beti prest laguntzarako, borondatetsu eta eskuzabal. Zure keinu, garraixi eta animoek auspotzen jarraituko gaituzte. Aurrera Turri! Egun haundirarte.
